უსუსური სტარტის კიდევ უფრო უსუსური გაგრძელება

470

საქართველოს ძიუდოისტთა ნაკრებისთვის ევროპის სამდღიანი ჩემპიონატის მეორე დღე წარუმატებელ პირველ დღეზე უარესი გამოდგა. ამჯერად ფინალურ ბლოკში ჭიდაობის უფლება ვერც ერთმა ქართველმა ვერ მოიპოვა. ოლიმპიური და ევროპის ჩემპიონი ლაშა შავდათუაშვილი, რომელიც მიმდინარე ევროპირველობაზე 73 კილოგრამ წონით კატეგორიაში მეორე ნომრად იყო განთესილი, პირველსავე შეხვედრაში დამარცხდა, გერმანელ იგორ ვანდტკესთან. ევროპის ორგზის ფინალისტმა ნუგზარ ტატალაშვილმა (81 კგ) კი ჩემპიონატი მონტენეგროელი სრან მრვალიევიჩის ძლევით გახსნა და მეორე წრეში ბულგარელ ივაილო ივანოვთან ვეღარას გახდა.

ირაკლი ცირეკიძის გაწვრთნილი გუნდის ცხრა წევრიდან ხუთმა ევროპის ჩემპიონატზე გამოსვლა უმედლოდ დაასრულა. დარჩენილი ოთხი ძიუდოისტი კი ქართველი გულშემატკივრისთვის ხასიათის გამოკეთებას ხვალ შეეცდება. 28 აპრილს ევროკონკურენციაში ჩაებმებიან: ბექა ღვინიაშვილი, უშანგი მარგიანი (ორივე 90 კგ), ვარლამ ლიპარტელიანი (100 კგ) და გურამ თუშიშვილი (+100 კგ).

წყარო: worldsport.ge