გიორგი ქვილითაია: “ტრავმამ ბევრი რამ შეცვალა… ახლა არ ვიცი, რა იქნება”

630

საქართველოს ნაკრებისა და ვენის “რაპიდის” ფორვარდმა გიორგი ქვილითაიამ კოჭზე ოპერაცია გაიკეთა. როგორც მან განაცხადა, ვარჯიშის დაწყებას 2 თვეში შეძლებს.

“ოპერაციამ ძალიან კარგად ჩაიარა, 2 თვეში შევძლებ ვარჯიშის დაწყებას. რაც შეეხება ტრავმას, ის ვარჯიშზე ორმხრივი ორთაბრძოლის დროს მივიღე.

ტრავმა ყოველთვის სამწუხაროა და ახლა მით უმეტეს, როდესაც კარგ ფორმაში ვიყავი… რას ვიზამთ, ფეხბურთია და დაზღვეული არავინ არაა.

“რაპიდიდან” ჩემი წასვლა? ყველაზე ნაკლებად ახლა სწორედ მაგაზე ვფიქრობ. მთავარია, რაც შეიძლება მალე ჩავდგე ფორმაში და დანარჩენს დრო გვიჩვენებს.

იყო რამდენიმე კარგი ვარიანტი, ახლა კი არ ვიცი, რა იქნება…

ბელგიის, ჰოლანდიის, გერმანიის, რუსეთისა და უკრაინის უმაღლესი ლიგებიდან მქონდა შემოთავაზებები.

შესაძლოა, მაინც წავიდე “რაპიდიდან”, მაგრამ ტრავმამ მაინც ბევრი რამე შეცვალა.

არავინ ისე არ გაიგოს, რომ ამ გუნდიდან გაქცევაზე ვარ. აქაც ძალიან ბედნიერი და კმაყოფილი ვარ, მაგრამ თუ უკეთესი ვარიანტები გამოჩნდება, რატომ არ უნდა წავიდე?!

ეროვნულ ნაკრებში ამხანაგური მატჩებისთვის გამოძახებული ვიყავი. ვლადიმირ ვაისმა დამირეკა და მას ჩემს ტრავმასა და ოპერაციაზე ვესაუბრე”, – აღნიშნავს ქვილითაია.